Mar 14 | NdeIBE | STEP | Kwasekusele izinsuku ezimbili kuphela ukuba ufike umkhosi wePhasika leDili leSinkwa Esingelamvubelo. Abaphristi abakhulu labafundisi bomthetho babedinga indlela ecatshileyo yokubopha uJesu ukuze bambulale.

Mark 14

UJesu Uyagcotshwa EBhethani

1 Kwasekusele izinsuku ezimbili kuphela ukuba ufike umkhosi wePhasika leDili leSinkwa Esingelamvubelo. Abaphristi abakhulu labafundisi bomthetho babedinga indlela ecatshileyo yokubopha uJesu ukuze bambulale.

2 Kodwa bathi, “Kakungabi ngesikhathi seDili, funa abantu benze isiphithiphithi.”

3 Kwathi eseBhethani eyeme etafuleni emzini wendoda eyayithiwa nguSimoni uMlephero, owesifazana weza ephethe umfuma wamakha adulayo kakhulu, enziwe ngenadi elipheleleyo. Wawugumula umfuma wathela amakha ekhanda likaJesu.

4 Abanye balabo ababekhona bacaphuka babuzana bathi, “Udlaliselani amakha la?

5 Abengathengiswa ngokudlula umholo womnyaka wonke imali leyo iphiwe abampofu.” Bamkhuza ngokumkhahlameza kakhulu.

6 UJesu wathi, “Myekeleni bo. Limkhathazelani kanti? Wenze into enhle kimi.

7 Abampofu lizahlala lilabo, yikho lingabasiza noma yisiphi isikhathi elisifunayo. Kodwa kalisoze libe lami kokuphela. 8 Wenze lokho abelamandla okukwenza. Uthele amakha emzimbeni wami mandulo ukulungisela ukungcwatshwa kwami. 9 Ngilitshela iqiniso ukuthi loba kungaphi okuzatshunyayelwa ivangeli emhlabeni wonke, lokho akwenzileyo kuzakhulunywa njengesikhumbuzo ngaye.”

10 Yikho uJuda Iskariyothi, omunye waBalitshumi lambili waya kubaphristi abakhulu ukuyanikela uJesu kubo. 11 Bathaba bafa ukuzwa lokhu bathembisa ukumupha imali. Yikho walindela ithuba lokumnikela.

Isidlo SeNkosi

12 Ngelanga lokuqala leDili leSinkwa Esingelamvubelo, lapho kwakungumkhuba ukwenza umhlatshelo wezinyane lePhasika, abafundi bakaJesu bambuza bathi, “Ufuna ukuthi siye ngaphi ukuthi siyokulungisela ukudla iPhasika na?”

13 Yikho wasethuma ababili kubafundi bakhe wabatshela wathi, “Yanini edolobheni, kuzakuthi indoda ezabe ithwele isigubhu samanzi izalihlangabeza. Ilandeleni. 14 Libokuthi kumninindlu ezangena kuyo, ‘UMfundisi uyabuza uthi, ‘Ingaphi indlu yezethekeli lapho engingadlela khona iPhasika labafundi bami?’

15 Izalitshengisa ikamelo elikhulu esitezi elilungisiweyo lafakwa izihlalo lamatafula. Silungiseleni khonapho.”

16 Abafundi basuka baya edolobheni bafica izinto zimi njengoba uJesu wayetshilo. Yikho basebelungisela iPhasika.

17 Kwathi kusihlwa uJesu wafika laBalitshumi lambili. 18 Bathi beyeme etafuleni besidla wathi kubo, “Ngilitshela iqiniso ukuthi omunye wenu uzanginikela – odla lami khonapha.”

19 Badana, bathi kuye ngamunye, “Kambe yimi?’ ”

20 Waphendula wathi, “Ngomunye waBalitshumi lambili, omunye otsheba lami isinkwa emganwini. 21 Indodana yoMuntu izahamba njengokulotshiweyo ngayo. Kodwa yiya kuleyondoda enikela iNdodana yoMuntu! Kwakungaba ngcono kuyo aluba yayingazalwanga.”

22 Bathi belokhu besidla uJesu wathatha isinkwa, wabonga, wasihlephula, wasipha abafundi bakhe esithi, “Sithatheni; lo ngumzimba wami.”

23 Wasethatha inkezo, wabonga wasebaqhubela, bonke banatha kuyo.

24 Wathi kubo, “Leli ligazi lami lesithembiso elichithelwa abanengi. 25 Ngilitshela iqiniso ukuthi angiyikunatha njalo okwesithelo sevini kuze kube yilelolanga lapho engizanatha khona kutsha embusweni kaNkulunkulu.”

26 Bathi sebehlabelele isihlabelelo, baphuma baya eNtabeni yama-Oliva.

UJesu Ubonisa Ngokuphika KukaPhethro

27 UJesu wabatshela wathi, “Lonke lizachitheka, ngoba kubhaliwe: “ ‘Ngizatshaya umalusi, izimvu zizahlakazeka.’

28 Kodwa ngemva kokuba sengivukile, ngizahamba phambi kwenu ukuya eGalile.”

29 UPhethro walandula wathi, “Loba bonke bengahlakazeka, mina kangisoze ngikwenze.”

30 UJesu wamphendula wathi, “Ngikutshela iqiniso ukuthi lamuhla lokhu – yebo kubona lobu ubusuku – iqhude lingakakhali kabili wena ngokwakho uzangiphika kathathu.”

31 Kodwa uPhethro waphika wagomela wathi, “Loba kungabe ngifanele ngife lawe, kangisoze ngikuphike.” Bonke abanye labo batsho khona lokho.

EGetsemane

32 Baya endaweni eyayithiwa yiGetsemane, uJesu wathi kubafundi bakhe, “Hlalani lapha mina ngisayakhuleka.” 33 Wathatha uPhethro loJakhobe loJohane wasuduka labo, waseqalisa ukukhathazeka kakhulu wahlulukelwa. 34 Wathi kubo, “Umphefumulo wami udabukile kakhulu ngosizi kungathi ngingaze ngife. Hlalani lapha lilinde.”

35 Wagudluka njalo kubo wazilahla phansi wakhuleka ukuthi aluba kungenzeka lelohora lingedlula kuye.

36 Wathi, “Abha, Baba, konke kungenzakala kuwe. Ake ususe inkezo le kimi. Kodwa kakungabi yintando yami, kodwa kube yintando yakho.”

37 Wasebuyela kubafundi bakhe wabafumana belele. Wathi kuPhethro, “Simoni. Ulele? Wehlulekile ukulinda ihora elilodwa kuphela?

38 Lindani likhuleke ukuze lingaweli ekulingweni. Umoya uyathanda, kodwa umzimba ubuthakathaka.”

39 Waphinda wahamba wayakhuleka wona lowo umkhuleko.

40 Wathi ekubuyeni wabafica njalo sebelele, ngokuba ubuthongo babubaphethe. Baswela ukuthi bathini kuye.

41 Esebuya okwesithathu wathi kubo, “Lilokhu lilele liphumula? Sekwanele! Isikhathi sesifikile. Khangelani, iNdodana yoMuntu isinikelwe ezandleni zezoni. 42 Phakamani! Kasihambeni! Nangu usefikile onginikelayo.”

Ukubotshwa KukaJesu

43 Esakhuluma, uJuda, omunye waBalitshumi lambili, wafika. Wayehamba lexuku behlomile ngezinkemba lezinduku, bethunyiwe ngabaphristi abakhulu labafundisi bomthetho kanye labadala.

44 Umnikeli wayelungise isiboniso sokubatshengisa wathi: “Lowo engizamanga nguye; limbophe lihle lihambe laye elindiwe.”

45 UJuda wahle waqonda kuJesu wathi, “Rabi!” wasemanga. 46 Amadoda ahle amdumela uJesu ambopha. 47 Kwasekusithi omunye owayemi khonapho wakhokha inkemba yakhe wagalela inceku yomphristi wayiquma indlebe yayo.

48 UJesu wathi, “Ngingumkhokheli womvukela yini, selingaze lize lihlomile ngezinkemba lezinduku ukuzangibamba?

49 Bengilani izinsuku zonke ngifundisa emagumeni ethempeli, kodwa kalingibophanga. Kodwa iMibhalo kufanele igcwaliseke.”

50 Khonokho bonke bamtshiya babaleka.

51 Ijaha elalingagqokanga lutho ngaphandle kwelembu lelineni lalimlandela uJesu. Balibamba 52 kodwa labaleka laze latshiya lesosambatho salo.

Phambi KoMphakathi ISanihedirini

53 UJesu bamthatha bamusa kumphristi ophezulu, kwathi bonke abaphristi abakhulu, labadala labafundisi bomthetho babuthana ndawonye. 54 UPhethro wamlandela ehambela khatshana, waze wayangena egumeni lomphristi ophezulu. Wahlala khonapho labalindi esotha umlilo.

55 Abaphristi abakhulu leSanihedirini yonke babedinga ubufakazi obumlahlayo uJesu ukuze bambulale kodwa babuswela.

56 Abanengi bafakaza amanga ngaye, kodwa amazwi abo kawavumelananga.

57 Kwasekusukuma abanye bethula lobu ubufakazi bamanga ngaye, bathi, 58 “Samuzwa esithi, ‘Ngizalibhidliza ithempeli leli, elakhiwe ngabantu ngakhe elinye ngezinsuku ezintathu, elizabe lingasakhiwanga ngumuntu.’ ”

59 Lakulokhu kabuvumelananga ubufakazi babo.

60 Umphristi ophezulu wasesukuma wabuza uJesu wathi, “Kanti kawuphenduli ngani? Uthini ngobufakazi lobu amadoda la abethulayo ngawe?” 61 Kodwa uJesu wala elokhu ethule kazaba lampendulo. Umphristi ophezulu waphinde wambuza wathi, “Unguye uKhristu, iNdodana yoBusisiweyo na?”

62 UJesu wathi, “Nginguye. Njalo lizayibona iNdodana yoMuntu ihlezi kwesokunene salowo Olamandla isehla ngamayezi ezulu.”

63 Umphristi ophezulu wadabula izigqoko zakhe wabuza wathi, “Sisabadingelani abanye ofakazi? 64 Selikuzwile ukuhlambaza. Lithini manje?” Bonke bamlahla bathi ufanele ukufa. 65 Abanye basebeqalisa ukumkhafulela; bamvala amehlo ngokumbopha, bamdutshuza ngenqindi bathi, “Phrofetha!” Abalindi basebemthatha bayamtshaya.

UPhethro Ulandula UJesu

66 UPhethro wayengaphansi egumeni, enye yamantombazana ayeyizincekukazi zomphristi ophezulu yeza khonapho. 67 Yathi ibona uPhethro esotha umlilo yamkhangelisisa. Yathi, “Lawe wawukanye laye umNazarini lo, uJesu.”

68 Walandula, wathi, “Angikwazi njalo kangikuzwisisi lokho okhuluma ngakho.” Wahle waphuma waya entubeni.

69 Kuthe intombazana leyo isimbona khona lapho yathi kwababemi lapho, “Indoda le ingomunye wabo.”

70 Walandula njalo. Ngemuva kwesikhatshana ababemi lapho eduze kukaPhethro bathi, “Ngeqiniso ungomunye wabo, ngoba ungumGalile.”

71 Watshinga uPhethro, waziqalekisa wabuye wafunga kubo wathi, “Kangiyazi indoda le elikhuluma ngayo.”

72 Masinyane lakhala iqhude ngokwesibili. Khonapho uPhethro waselikhumbula ilizwi uJesu ayelitshilo kuye, ukuthi: “Iqhude lingakakhali kabili uzangiphika kathathu.” Ngakho waphihlika wakhala.